په دې وروستیو کي داسي څراغونه جوړ سوي چي بېټرۍ او سولر ته له اړتیا پرته، د انسان د بدن په عادي تودوخي روښانه کېږي. که څه هم دغه څراغونه ډېر قوي نه دي، خو په ډېري آسانۍ سره روښانه کېږي، ځکه دا څراغونه داسي عیار سوي چي ستاسو د بدن تودوخه د انرژي په توګه مصرفوي.

د لومین په نامه دا څراغونه ځانګړی کوچنی جوړښت لري. په خپل جوړښت کي د ګوتي له پاره ځانګړی ځای لري. ګوته پر ایښودل کېږي او د ګوتي د تودوخي انرجي په برېښنايي انرجي اړوي. د CREED LED په نامه کوچنی څراغ په کښي ځای پر ځای سوی چي په کافي اندازه رڼا تولیدوي. د دې له پاره چي دا څراغونه د خپل کوچني جوړښت له امله په تیاره کي ورک نه سي، یوه برېښېدونکې ټوټه هم پر نصب سوې ده. دا ځلانده ټوټه تر لسو کلونو پوري د ځلېدو وړتیا لري او په آسانۍ سره په تیاره کي د څراغ د پیدا کېدا سبب کېږي.

د Kickstarter په نامه یوې کمپنۍ اوس مهال د دې څراغونو تولید ته بودجه ځانګړې کړې ده. اوسنی قیمت ئې ۳۵ ډالره دی.

بل خوا بیا د چین په شنګهای ایالت کي یوې لېزر جوړوونکي کمپنۍ داسي څراغ جوړ کړی چي یو خو ډېره رڼا تولیدوي، بل دا چي اور هم بلوي. پر دغه څراغ حتی‎ هګۍ هم پخېږي. دا څراغ چيFlash torch mini light په نامه سره یادېږي، ۲۳۰۰ لومین لرونکی هیلوجن څراغ دی چي اور بلولای سي. په دې څراغ کي د طیارې المونیم کارول سوی او عدسیه ئې هم د ګرمۍ ضد خاصیت لري.

دا څراغ د ۱۰۰ کوچنیو څراغونو په اندازه رڼا تولیدوي. اوږدوالی ئې ۸ انچه او وزن ئې ۳۸۵ ګرامه دی، خو تر دې کوچني هم جوړ سوي دي.

دا مطلب شريک کړئ

۰