ماليې وزارت د ۶۳۱ ميليون امريکايي ډالرو په ارزښت قرارداد لاسليک کړ

ماليې وزارت د ۶۳۱ ميليون امريکايي ډالرو په ارزښت قرارداد لاسليک کړ

د مالیې وزارت او اغاخان پراختیایي بنسټ ترمنځ بدخشان ولایت ته د ۶۳۱ میلیون امریکایي ډالرو په ارزښت د برېښنا رسونې پروژې قرارداد لاسلیک شو.

د مالیې وزارت سرپرست او د زېربنا په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، او اغاخان پراختیایي بنسټ اجرائیوي رئیس ښاغلي لطاف کاسم، ترمنځ بدخشان ولایت ته د ۶۳۱ میلیون امریکایي ډالرو په ارزښت د برېښنا رسونې پروژې قرارداد نن د چنګاښ میاشتې په ۳۱ مه نېټه د مالیې وزارت په خیبر هال کې لاسلیک شو.

د قرارداد لاسلیکولو په مراسمو کې د اوبو او انرژۍ وزارت سرپرست ښاغلي محمد ګل خُلمي، د افغانستان برېښنا شرکت عمومي رئیس ښاغلي امان الله غالب، په ولسي جرګه کې د بدخشان ولایت د خلکو استازو، په افغانستان کې د اغاخان پراختیایي شبکې استازې اغلې نورجهان مواني، د مالیې وزارت رئیسانو او یو شمېر کارکوونکو ګډون کړی وو.

د مالیې وزارت سرپرست د قرارداد لاسلیکولو په اړه وویل:

” د عامه او خصوصي مشارکت له لارې خصوصي پانګونه او د انرژۍ په برخه کې خپلواکي د حکومت پالیسي او موخه ده. بدخشان ولایت ته د برېښنا رسونې په پروژه کې د لېږد کرښې جوړښت، د تولید او وېش شبکې او د دې ولایت په ټولو ولسوالیو کې د اوبو برېښنا پراخول شامل دي.”

نوموړي زیاته کړه:

” په ټولیزه توګه نوموړې پروژه کې د ۹۱ میګاواټه برېښنا تولید، د ۱۱۰ کلیو ولټه برېښنا لېږدولو کرښه او د بدخشان ولایت ټولو ولسوالیو ته د برېښنا وېشل شامل دي، چې د عامه او خصوصي مشارکت له لارې پلي کېږي.

د اغاخان بورډ اجرائیوي بورډ رئیس وویل:

” موږ ته دغه قرارداد ډېر ارزښتمند دی، بدخشان ولایت ته د برېښنا رسونې پروژې پلي کول، د دې ولایت د خلکو اړتیاوو پوره کولو ترڅنګ په نورو بنسټیزو سکټورونو هم اغېز لري. موږ غواړو د افغانستان له حکومت سره په ګډه دغه پروژه پلي کړو کړو.”

د یادونې وړده، چې د دې پروژې د قرارداد موده ۳۰ کاله ده او په څو پړاوونو کې به پلي شي او هر پړاو یې اووه کاله نیسي.




t