کرکټ: د غازي امان الله خان جام یو ورځنیو سیالیو د دریم پړاو پرانېسته وشوه

کرکټ: د غازي امان الله خان جام یو ورځنیو سیالیو د دریم پړاو پرانېسته وشوه

د ننګرهار ولایت په غازي امان الله خان لوبغالي کې نن د غازي امان الله خان جام د یو ورځنیو سیالیو پرانېسته وشوه چې د افغانستان کرکټ بورډ اجراییه مشر ښاغلي لطف الله ستانکزي په ګډون پکې د دغې ادارې یو شمېر نورو مسوولینو هم شتون درلود.

ښاغلي ستانکزي وویل، دغه بڼه سیالۍ ډېرې مهمې دي چې په ډېره ښه توګه د زونونو ترمنځ ترسره کېږي او اداره ورته ډېره پاملرنه کوي چې دغه سیالۍ به له تخنیکي پلوه او د لوبغاړو د استعداد لوړلو په برخه کې ډېرې غوره تمامې شي.

د هغه په وینا: ((لکه څرنګه چې په دغو سیالیو کې ملي لوبغاړي هم ګډون لري، نو نوي استعدادونه او ځوانان دې هم د هغوی له تجربو ګټه واخلي او ځانونه دې وځلوي، ټول لوبغاړي ازموینې او غوره کړنو څرګندولو وروسته دغه پړاو ته لاره موندلې، زه باوري یم چې ځوان لوبغاړي به هم په یادو سیالیو کې ځانونه ډېر ښه ثابت کړي.))

نوموړي دغه راز زیاته کړه، د کورني کرکټ پیاوړتیا د ادارې په لومړیتوبونو کې ده چې دغې برخې ته به ډېره پاملرنه کېږي.
باید وویل شي چې دا د غازي امان الله خان جام یو ورځنیو سیالیو دريم پړاو دی چې د هېواد د پنځو زونونو ترمنځ په ډېر لوړ کیفیت سره ترسره کېږي.
د یادولو ده چې دغه سیالۍ نن د (سپټمبر ۱۰مه) د ننګرهار په غازي امان الله خان لوبغالي کې پیل او د همدې میاشتې تر ۲۳مې نېټې پورې به دوام ومومي چې له پایلوبې پرته به ټولې لوبې په یاد لوبغالي کې ترسره شي او پایلوبه به د کابل په کرکت لوبغالي کې ترسره شي.



غازي امان الله خان جام؛ کرکټ
t