امرالله صالح وايي پاکستان ورته ۱۱ پټ شرطونه وړاندې کړي ول

امرالله صالح وايي پاکستان ورته ۱۱ پټ شرطونه وړاندې کړي ول

د جنګ پټ اړخونه څه دي، زه فکر کووم پټ اړخونه نشته د جګړې، خو دا چې پټ اړخ څوک دی چې زموږ قرباني اخلي، دا درته وایم
۲۰۱۱م می میاشت کې د اسامه بن لادن له وژل کیدو وروسته پاکستان افغانستان ته وړانديز وشو، دا وړاندیز پرته له کوم لاسلیک افغان حکومت ته ورکول شو او لیکل شوي و چې که دا ۱۱ شرطونه ومنل شي، طالبان جګړه ختموي او سوله کوي.
دا پټ شرطونه څه وه؟
دا شرطونه په خپل ځای پاتې دي، که دا د ذلت شرطونه ومنو سبا هم سوله راتللی شي.
لومړی: پاکستان ویل، تاسو باید هیڅکله دیورند کرښه و نه وایي سرحد وواي، د دې سرخد د امن لپاره باید ګډ کمېسیون جوړ شي.
دویم: د اوبو په سر باید د پاکستان او افغانستان ترمنځ کومه شخړه نه وي، دواړه هېوادونه باید یوه هوکړه لاسلیک کړي چې کومه شخړه رامنځ ته نه شي، دا یو څه معقول شرط و.
دریم شرط: د پاکستان د پوځ او امنیت دیرش سلنه روزنه باید پاکستان کې وګوري.
څلورم شرط: پاکستان باید منځنی اسیا ته پرته له قید شرط لاس رسی ولري.
پنځم: افغان حکومت باید ستراتيژیک تړونونه له لویدیځ هېوادونو سره لغوه کړي.
شپږم: د افغانستان د کانونو او زیرمو کیندنه باید پاکستان، چین او افغانستان ونډه ولري او د انحصار حق ولري، نورو شرکتونو ته باید اجازه نه وي چې افغانستان کې کانونه استخراج کړي.
اووم: د پاکستان او افغانستان د استخباراتو ترمنځ باید اړیکې جوړې شي، یا په بل عبارت د افغانستان استخبارات دې د ای ایس ای یوه څانګه وګرځي.
اتم شرط: که چیرې تاسو خپل ستراتيژیک تړون له لویدیځو هېوادونو سره لغوه کوئ او که تشه رامنځ ته کیږي نو ژمنه کوو چې چین ، پاکستان او افغانستان به یو ستراتيژیک هوکړه رامنځ ته کړو، که امریکایان وځي، نو ستونزه به پآکستان او چین حل کوی.
نهم شرط: هندوستان کونسلګرۍ چې ولایتونو کې دي، باید وویستل شي او هندي شرکتونو ته باید اجازه ور نه کړل شي، چې افغانستان کې پانګونه وکړي.
لسم شرط: هغه کسان ، شخصیتونه، میډیا او نور چې پاکستان ضد خبرې کوي، باید چوپ شي، که نه چوپ کیږي باید وتړل شي.
یوولسم: ډیورنډ کرښه هاخوا خپلې اړیکې پښتنو مشرانو سره پرې کړي، که افغان حکومت غواړي پښتنو مشرانو ته بلنه ورکړي چې پښتانه مشران افغانستان ته راشي، باید پاکستان حکومت څخه اجازه واخلي، موږ به هم همداسې کوو، هڅه دې وشي چې پښتانه سره بیل شي، کوز پښتانه خپله سیاسي قبله اسلام اباد ومني او د نورو پښتنو قبله باید کابل وي.
دا یوولس غوښتنې وې، که دا غوښتنې ومنل شي، افغانستان شاتګ ته ځي، هغه پټ جنګ کې چې موږ یې قرباني ورکوو، هغه دا یوولس مسایل دی، افغانان به هیڅکله دا ذلیل شرطونه و نه مني.
خلک وایي تاسو د افغانستان د پت ساتونکي نه یاست، موږ د افغانستان د وقار ساتونکی یو.
که نن زه ووایم چې افغان نه یم، بیا په ما هیڅکله برید نه کیږي، پاکستان د افغانستان هویت له منځه وړل غواړي، پآکستان غواړي اوسنی افغان نسل له خپل تاریخ بې خبره وي.
نه موږ اټومي وسلې لرو، نه پياوړی اقتصاد لرو، خو یو پیاوړی هویت او بیرغ لرو چې زموږ هویت یې ساتلی، خو پاکستان غواړي دا دواړه له موږ واخلي.
طالبان ولې غواړي د ملا فضل الرحمن بیرغ په موږ تحمیل کړی، زموږ بیرغ کې څه کم دي چې تاسو یې پروړاندې جنګ کوئ.
ته د افغانستان لپاره نه جنګیږې، ستا د جګړې لامل دا یولس ذلیله شرطونه دي.
پرون پروان کې غونډه وه، له ۶۰ زره زیات خلکو غونډه کې ګډون کړی و، هر یو په ډیره میړانه او ولولو سره راغلي و چې د افغانستان د یووالي او بیرغ لپاره یې شعارونه ورکول.
طالبانو د دې غونډې نږدې برید وکړ او په ویاړ سره یې د دې برید مسوولیت ومنه، دا غږ د طالبانو له کراچۍ او اسلام اباد څخه و.
په ما چې برید وشو ، خلکو ویل د چا لاس پکې و، زما لاس سره کار نشته، مغز په راولپنډۍ کې دی، زه لاس سره کوم مشکل نه لرم، زما مشکل د مغز سره دی، ځکه دا لاس د مغز په خدمت کې دی.
په هڅوولو دوزخ ته درسره ځم، خو په زور جنت ته درسره نه ځم.
خدای اوس موږ ته ښه چانس راکړی، طالبان کولی شي خلک ووژني، خو دا غږ نه شي چپ کولی چې د افغانستان د ابادۍ لپاره پورته کیږي او دا غږ هره ورځ پیاوړی کیږي.
دا غږ اوس د افغانستان لپاره دی، شمالي او جنوبي ټلواله پکې نشته.
دا اوسنی غږ به زموږ د ولسواکۍ بنسټ نور پياوړ کړي.
کابل، امن کنفرانس
سپتمبر ۱۸مه

صادق ترابزی



صالح لیکنه پاکستان
t