له مړینې ۱۷ میاشتې وروسته هم بدن ښوري

له مړینې ۱۷ میاشتې وروسته هم بدن ښوري

څېړونکي وايي، په یو لړ تحقیقاتو کې، چې ۱۷ میاشتې وخت یې پرې تېر کړی، ورته څرګنده شوه چې د انسان مړی تر یو کال پورې خوځي.

د کرونیکل هیرالډ ورځپاڼې د راپور له مخې، استرالیايي څېړونکي وايي، د څېړنې په ترڅ کې ورته ښکاره شوه چې له مړینې وروسته د انسان جسد تر یو کال پورې ښوري.

دوی د (AFTER) په نوم په تحقیقاتي مرکز کې، چې د مړو په کروندې مشهور دی، له ټایم لپس کمرو څخه په کار اخیستو هره ورځ د ۳۰ دقیقو لپاره د ورځې په رڼا کې د مړو د سر ویډیو ثبت کړې ده.

د دې څېړنې غړی الیسن ویلسن په دې اړه وايي«موږ ته څرګنده شوه چې د مړو مړوندونه خوځي، مثلاً د بدن له څنګه مړوند لاندې لوېږي.»

که څه هم پخوا ساینسپوهانو اټکل کاوه چې انسان د تجزیه کېدو په لومړیو پړاوونو کې حرکت کوي خو په اخیستل شویو ویدیوګانو کې د مړي حرکت دوی حیرانه کړي دي.

دا له مرګه وروسته د انسان د بدن په اړه په تحقیقاتو کې لوی انکشاف دی. تر دې وړاندې څېړونکو داسې تصور نه کاوه.

پر دې سربېره د ویلسن څېړنې مرسته کړې چې د مړي د تجزیه کېدو د وخت په اړه هم ګټور معلومات ترلاسه شي.




t