اميدواره ښځه څه ډول خواړه بايد وخوري؟

اميدواره ښځه څه ډول خواړه بايد وخوري؟

یوه امېندواره او شیدې ورکوونکې مور باید په ورځ کې ۵ یا ۶ ځله خواړه وخوري، هغه ښځې چې ښه خوراک کوي او د ماشوم ښه ساتنه کوي، ډېر امکان لري چې سالمه امېندواري او روغ ماشوم ولري. په دې مطلب کې هغه سالمې او صحي لارې چې د مور او ماشوم د خوندیتوب او د یوې ښې امېنداوري لپار اړینې دي راغلې دي؛ نو ښه به وي چې ښځې ترې ګټه واخلي، څو د ژوند په هر ډګر کې سالمې پاتې شي.

ښه خواړه وخورئ

۱. ښه خواړه خوړل له مور او ماشوم سره مرسته کوي چې قوي او روغ پاتې شي.

۲. ښه خواړه یانې په پوره اندازه خوراک او بېلابېل خواړه خوړل.

۳. له مور سره مرسته کوي چې د ناروغیو په پر وړاندې مقاومت ولري او سالمې پاتې شي.

۴. د ښځې هډوکي او غاښونه قوي کوي.

۵. ښځې ته د کار کولو ځواک ورکوي.

۶. له ماشوم سره مرسته کوي چې د مور په رحم کې ښه وده وکړي.

۷. له زېږون وروسته د شدیدې وینې بهېدنې مخنیوی کوي.

۸. له مور سره مرسته کوي چې له زېږون وروسته خپله انرژي بېرته ژر پوره کړي.

زیات خواړه وخورئ

امېندواري او شیدې ورکوونکې مېرمنې له عادي حالته ډېرې تغذيې ته اړتیا لري، ډېره غذا مور ته زیاته انرژي او قوت ورکوي، د ماشوم د ودې لپاره ګټوره تمامېږي.

ځينې امېندواري مېرمنې د زړه بدوالی لري او نه غواړي چې خوراک وکړي، خو امېندواري مېرمنې ډېرې غذا او انرژي ته اړتیا لري؛ نو باید په پوره اندازه خوراک وکړي، حتا که هغه ښه احساس هم و نه لري، د ساده خوراکونو خوړل ښايي دې ښځو ته اسانه وي، لکه وریجې، جواري او د تناره ډوډۍ وخوري.

بېلابېل خواړه وخورئ

یوه امېندواره مور د نورو ښځو په پرتله ډېره اړتیا لري چې ښه خواړه وخوري، اصلي خوراکونه کاربوهایډرډونه، وده ورکوونکي خواړه پروټینونه، ښایسته کوونکي خواړه منرالونه، وېټامینونه او حرکت «لويوونکي» غوړ او خواږه خواړه، ورسره په ډېره اندازه مایعات وکاروي.

دا پنځه ډوله پروټین او منرالونه هره ورځ وخورئ

امېندواره او شیدې ورکوونکې مېرمنې نسبت له نورو ښځو ډېرې دې پنځو وېټامینونو او منرالونو، ایوډین، وېټامین اې، کلسیم، اوسپينه او فولیک اسیډو ته اړتیا لري؛ نو امېندواره مور باید هڅه وکړي چې په پوره اندازه له دې وېټامینونو او منرالونو ګټه واخلي، ځکه هغه ماشوم چې د مور په رحم کې دی، د ښې ودې لپاره دغو خوړو ته ضرورت لري.

هغه ستونزې چې د ښه خوراک نه کولو په پایله کې منځ ته راځي

د ښو خوړو نه خوړل مور او ماشوم دواړه له ستونزو سره مخ کوي، د ښه خوراک د نه کولو له امله ښځې د ستړیا، کمزوري، د میکروبونو پر وړاندې ضعیفوالی او په نورو جدي روغتیایي ستونزو اخته کېږي، خراب غذایي رژیم د امېندواري په وخت کې خطرناک کېدای شي، دا د دې سبب ګرځي چې مور ناګهانه نقصان وکړي یا هم کم‌وزنه او بې‌تناسبه ماشوم وزېږوي. تر ډېره د مور د مړينې سبب هم ګرځي.




t