د ټاکنو په اړه وروستي واقعیتونه – اجمل هوډمن

د ټاکنو په اړه وروستي واقعیتونه – اجمل هوډمن

د لړم مياشتې په ۵ مه درملوګ کمپنۍ د ټاکنو خپلواک کميسیون ته رپوټ ورکړ، چې تر اوسه پورې د ۱،۹۲۹۳۳۳ رايه ورکونکيو د بايومتریک پېژندنې اطلاعات server ته لېږدېدلي دي. ور پسې د لړم په ۱۰مه نېټه درملوګ کمپنۍ د ټاکنو خپلواک کميسیون ته ولیکل، چې له تصفيې وروسته دوی دا موضوع تاييدوي، چې د رايه ورکونکيو د بايومتریک اطلاعاتو شمېره ۱،۸۴۳۱۰۷ده او دا خالصې رايې يا د رايه ورکونکيو د معلوماتو سپین ليست دی. هغه ۸۶۲۲۶ بايومتریک اطلاعات چې درملوګ کمپنۍ د معيارونو خلاف بللي، د کميسیون تصویب ته اړتيا لري، احنمالا په دې کې هم يو شمېر اطلاعات وي، چې د کميسیون له تصویب وروسته اعتبار ومومي.
په همدې ځای کې د يادونې وړ ده، چې تر اوسه پورې د هغو څه باندې ۷۰۰ محلونو د رايه ورکونکيو د بايومتریک اطلاعاتو برخلیک نه دی ټاکل شوی، چې د بايومتریک وسيلې او ميموري کارډونه يې ورک شوي دي. د دې محلونو د نتایجو فورمې او TEB خریطې کميسيون ته رسيدلي، خو بايومتریک اطلاعات يې د ډيوايسونو او ميموري کاردونو د ورکېدو په سبب نشته. اصولاً د ټاکنيزو قوانينو او لايحو له مخې ايجاب کوي، چې د دې محلونو رايې دې د نتايجو د فورمو له مخې محاسبه شي. حساس انتخاباتي مواد که په هر دلیل ورک وي، خو د اساسي قانون د ۳۳ مې مادې له مخې د خلکو د رايو د حق د نقض دلیل نه شي ګڼل کیدای! کميسيون قانوناً مکلف دی، چې په دې اړه عادلانه پرېکړه وکړي.
په هغو مواردو کې، چې بايومتریک دستګاه نه ده کارول شوې، يو مورد يې د تقلب دی، چې موږ په جدي توګه د تقلب مخالف اوپه ټاکنو کې د شفافیت د تامین غوښتنه کوو، خو ځینې موارد شته، چې يا خو کميسیون د بايومتریک دستګاه لپاره تخنیکي کارکوونکي يا په ښځينه محلونو کې ښځینه کارکوونکي نه لرل چې د دستګاه د کارولو ظرفیت ولري. يا دستګاه د تخنيکي ستونزو په علت کار نه دی کړی. دلته بيا هم د اساسي قانون د ۳۳ مې مادې له مخې کميسیون ته په کار دي، چې د خپلو ولایتي دفترونو د رپوټونو له مخې په دې برخه کې له احتياط نه کار واخلي او د خلکو مشروع رايې وساتي او تقلبي موارد بې اعتباره اعلان کړي. موږ د دې تر څنګ چې د خلکو د مشروع رايو دفاع کوو د ټاکنوله خپلواک کميسیون نه د تقلبي رايو د بې اعتباره کولو غوښتنه کوو.
د ثبات او همګرايي د ټيم له خوا د ۳۰۰ زرو رايو د بطلان ادعا بې بنسټه او د ټاکنو د مشروعیت په ضد د دوی د توطئې يوه برخه ده.
۱۳۷۰۰۰ رايې د ټولو ۳۴ ولایتونو د هغو محلونو رايې دي، چې له احتياطي دستګاه نه په کې کار اخستل شوی او درملوګ کمپنۍ تصديق کړې، چې د رايو د صحت ټول تخنيکي او حقوقي شرایط په کې رعایت شوي دي. د ۱۰۲۰۰۰ رايو په اړه د ټاکنو دقانون د ۸۴ مې مادې د ۴ فقرې په اساس د کميسیون د ۶/ ۷/ ۱۳۹۸ نېټې ۹۹ شمېره مصوبه موجوده ده او د ورکو شويو ډيوايسونو يا ميموري کاردونو په موضوع کې د کميسیون د کارکوونکو غفلت د خلکو د حقه رايو د ابطال دلیل نه شي کېدای.
دوی له هرڅه وړاندې په دې خبره تاکيد کاو، چې يوازې بايومتریک رايې ورته د منلو دي، خو اوس چې د ناکامۍ په درشل کې دي، حتا بايومتریک شوې رايې نه مني.
د ثبات او همګرايي ټيم له مخکې منل شوي اصول نه مني. په کميسیون فشار راولي او فرمايشونه ورکوي. د کميسیون خپلواکۍ او کاري استقلال ته بې احترامي کوي. له واقعيته لرې، افتراء آميزه او فتنه انګيزه اتهامات لګوي. دا هر څه د کانديدانو د طرزسلوک نقض دی.
د ټاکنو له خپلواک کميسیون نه غوښتنه داده، چې په بشپړناپېيلتوب د خلکو د رايو ساتنه وکړي. په تخنيکي پروسو کې خپل دويم مهال وېش ته په پام سره د لړم په ۲۳ مه پايلې اعلان کړي.



مقاله هوډمن ټاکنې
t