د میدان وردګ د سید آباد ولسوالۍ خلک سوله او ټیکاو غواړي

د میدان وردګ د سید آباد ولسوالۍ خلک سوله او ټیکاو غواړي

د میدان وردګ ولایت د سید آباد ولسوالۍ جګړې ځپلي اوسیدونکیو ویلي، چې له تېرو اتلس کلونو راپدیخوا د امنیتي ځواکونو او طالبانو تر منځ په نښتو کې کې یې د خپلو کورنیو غړي له لاسه ورکړي دي او له تاوتریخوالي ستړي شوي دي.

د میدان وردګ ولایت د سید آباد ولسوالۍ د کړوخېلو او یوسف خېلو په کلي کې میشت خلک د جګړې له ښکېلو خواوو غواړي، چې سوله وکړي او په دې سیمه کې ټیکاو رامنځته کړي.

دوی څرګندوي، چې په تېره اتلس کلنه جګړه کې یې د خپلو کورنیو زیاتره غړي له لاسه ورکړي او لس ورځې مخکې د شپې پر مهال د امنیتي ځواکونو او طالبانو تر منځ په نښته کې د محمود کورنۍ  له سرپرسته یې هم خوږ ژوند واخیست.

دغې کورنۍ جواد نومی زوی، چې په شپنیو عملیاتو کې یې خپل سرپرست له لاسه ورکړی وایي، له جګړو ستړي شوي او له ښکېلو خواوو غواړي، چې سوله وکړي.

نوموړي په دې اړه د حکومت د همکاریو غوښتنه وکړه.

دا په داسې حال کې ده، چې څو ورځې مخکې د سید آباد ولسوالۍ د ملي خېلو په کلي کې هم ځینو  خلکو ادعا کړې وه، چې امنیتي ځواکونو یې د استوګنې کورونه وران کړي او له حکومته یې د عدالت غوښتنه کړې وه.




t