زرينې لارې

زرينې لارې

مير احمد ياد

یو وخت مې ژباړې لپاره کتابونه لټول، زرینې لارې هغه کتاب و چې میاشتې میاشتې راسره په یوه فولډر کې پروت و، اخر مې یوه ورځ وویل ته راځه دا وګوره چې څنګه کتاب دی. ما ترې څو جملې پوسټ کړې، په همدې وخت کې یو بل کس ددې کتاب ستاینه کړې وه او ما یې ژباړه لږه تېزه کړه.

دا کتاب څو ورځې مخکې په دویم ځل چاپ شو، خو زما د خوښې په کتابونو کې یو دی.

دا کتاب د یوه کوریايي سوداګر کیسه ده، ډېرې سختۍ یې تېرې کړې، ورځپاڼې یې خرڅولې، بیا یو شرکت کې کاریګر و، اخر څو کاله وروسته د خپل شرکت خاوند شو او پانګه یې میلیاردونو ډالرو ته ورسېده.

کتاب ځوانانو ته لیکل شوی دی. د خپل هیواد په اړه وایي چې کوریا ستر ملت دی او ستر ملت به وي.. کتاب چې چاپ شو، دوه کاله وروسته اقتصادي بحران راغی، میلیاردر کیم وو چونګ کنګال شو او د پولۍ ټک ته کېناست. بده یې لا دا شوه چې پوروړو پسې را واخیسته، تر زندانه یې ورساوه او بیا یې له هیواده وویست.

په ۲۰۱۲ کال کې کیم وو چونګ رسماً د سوداګرۍ له نړۍ سره خدای په اماني کوله او د یوه کنګال شوي سوداګر په توګه یې خپله وروسته وینا کوله.

ما یې وروسته وینا ولټوله، فکر مې کاوه چې اوس به دی هم مات شوی وی، خپلې ګیلې مانې به وکړي، خلک به ملامت کړي، تقدیر به پړ وبولي … خو کیسه اپوټه وه.

کیم وو چونګ له دومره ستونزو وروسته بیا هم هماغه روحیه لرله لکه له دومره لویې ماتې مخکې یې چې په کتاب کې ښودلې وه.

بیا یې هم ویل چې کوریا لوی او باتور ملت دی، کوریایي ځوان قوي ځوانان دي او دا ملت به پرمختګونه کوي.

له دې پوهېږئ چې د کتاب لیکوال څومره د قوي هوډ او مثبت لیدلوري خاوند دی.

ما په خپلو کتابونو کې ډېر ځل همدا کتاب لوستی او زما په ژوند کې د بدلون لومړۍ خښته همدې کتاب ایښې ده.

دا کتاب لوستل به ارزښت درکړي، په خپلو سترګو کې به مو قدر زیات شي، پر ځان به مو باور لوړ شي او د یوه لوی کار کولو مثبته انرژي به درکړي.




t