له خطره ډکه لار (کابل ـ جلال اباد)

له خطره ډکه لار (کابل ـ جلال اباد)

تخنیکي ستونزې:
۱. په زیات شمېر، د لنډو شعاع لرونکو ګولایانو موجودیت ددې سبب ګرځي چې د زیات سرعت پر مهال ترافیکي پېښې رامنځته شي.
۲. د اورښتونو پر مهال د غرونو او غونډیو په ناوونو کې د سیلابونو په راوتو سره ټولې اوبه او ښویېدونکی جغل د سرک له عرض څخه تېرېږي چې اکثره د لارې بندېدو او ټکرونو لامل ګرځي.
۳. د غرونو او غونډيو پر څنډو د راښویېدونکو تیږو او جغل لپاره لازم تدابیر نشته، کله کله د زلزلې او یا ځینو نورو لاملونو له وجې تيږې او یا هم جغل راښويېږي او ترافیکي پېښې رامنځته کېږي.
۴ . د سیند پرغاړه استنادي دېوالونه Retaining walls د اوبو له خطر سره مخ دي، د سېلابونو پر مهال په ځینو ځایونو کې قسمي تخریب هم ددې لامل ګرځي چې ترافیکي پېښې رامنځته شي.
۵. د سرک پر غاړه ساتونکي دېوالونه Parapet walls د کم مقاومت لرونکي دي او د ټکر پر مهال یې اکثره دېوالونه په اسانۍ نړېږي او موټر سیند ته ورغورځېږي، ممکن د ځینو دېوالونو مقاومت د تخنیکي مشخصاتو مطابق وي خو د موټر سرعت ددې لامل ګرځي چې ټکر رامنځته شي او موټر سیند ته وغورځېږي.
حل لارې:
ـ د دویم سرک په رغولو سره به د پېښو کچه راکمه شي.
ـ د سرک د ګولایانو په پراخولو، د استنادي او ساتونکو دېوالو تحکیم کارۍ سره به هم د ټکرونو کچه کمه شي.
ـ د تيږو او جغل د ښويېدو د مخنیوي لپاره د دېوالونو جوړول هم د پېښو د مخنیوي لامل ګرځي.
ـ د ټرافیکي نخښو او هېندارو لګول او د ټرافیکي څار زیاتول هم د پېښو په مخنیوي کې موثر تمامېږي.
ـ د اورښتونو پر مهال په لاره کې د احتیاطي تدابیرو په موخه ځای ځای چلوونکو ته لارښوونې او د سرک د مراقبت د ګرځنده ټیمونو ګمارل هم د پېښو کچه راکموي.
یادونه: کېدی شي نورې ستونزې او حل لارې هم وي خو دا زما په یاد راغلې.

انجینر اباسين بهیر

لیکوال

حامد سيال

حامد سيال يو فعال افغان ژورناليست او د ټاټوبي نيوز خبري ويب پاڼي همکار دی.




t